الموضوع: الحب الحقيقي.......

للشعر نزوه وثوره وجموح لايكبح

تغزونى كل مساء

فأليكم هذه المتواضعه


عسي انت تنال الرضي فقط...


بعض الاصوات تشرح خاطري ياسعد = وبعض الاصوات ماودي بسمعانهـا

بعد صوت الحبيب اللي لحبـي جحـد = عافت النفس كـل اصـوات خلانهـا

وعافت العيـن من عقبـه لذيـذ السهـد = واستعـادت مواجعهـا وحرمانـهـا

وكل جرحن قديم من الغـرام استجـد = والعـروق النديـة جفـت اغصانهـا

لاذكرتـة وجفنـي ساهـر مـارقـد = من عيونـي دموعـي هـل هتانهـا

اتعـوذ واردد قـل هــو الله احــد = قبل يستحـوذ الاعصـاب شيطانهـا

ياسعـد كـل ماراجـن حمـام البلـد = كـن قلبـي علـى خفـاق جنحانهـا

وكني الفاقد اللـي مـادرا وش فقـد = يقتلـب والهجـوس اقـرع ببيبانهـا

غلطة العاشق اللي في هـواه انقـرد = يوم غاص البحور وصـار غرقانهـا

حكمة الوقت ومن ثابر وجـد. وجـد = وحكمة الحب تبكـي العيـن حبانهـا

بس ياللاسف وش حصـل المجتهـد = غيـر تحطيـم رغباتـه وكتمانـهـا

هية ياللـي ملكـت الـروح لاتبتعـد = لاترجـع لنفسـي ماضـي احزانهـا

انت وجه السعد ون غبت غاب السعـد = السعـادة علـى غرتـك عنوانـهـا

والشفايـف بنفسـج والثنايـا بــرد = والشعر ذيـل شقـراُ طـال ميدانهـا

تفتـن النـاس يافتـان بنـت وولـد = وتسمعك صمهـا تنظـرك عميانهـا

الله انة يفكـك مـن عيـون الحسـد = ومن نفوس ضعيف نـازع إيمانهـا

من خدودك بروق وفي خفوقي رعـد = غيمتن هـل وسـط الجـاش هتانهـا

واثق انـك بحسنـك والبهـا منفـرد = واثق انك نظـر عينـي وسلطانهـا

اطلب اللي تبـي منـي وانـا مستعـد = لعنبو مـن نطـق كلمـه ولاصانهـا

لك عيوني وقلبي ويـش باقـي بعـد = كان منوتك روحـي جـود عنانهـا

انت لك جبروت الحسن قـام وسجـد = والقصايـد عليـك تزيـن قيفانـهـا

ويالعـل العيـون ان خانتـك للرمـد = وانت منزلك خابره بيـن حجانهـا

انت غيرك بكل الكون ماحـب احـد = واهـل مكـة هـم الادرى بشعبانهـا

والله انـي لحبـك يالغضـي للابـد = لين تنكر ظهـور الخيـل فرسانهـا

ولين الف بكفن ثـم اروح يـم اللحـد = ثـم يالله علـى الدنـيـا وسكانـهـا

طف نار المعذب مـل صبـر وجلـد = وانـت تقـدح فتيلتهـا بصوانـهـا

خلني بـس ليـن اذوق طعـم الشهـد = واتمـتـع بمشمشـهـا ورمانـهـا

لايطمنـك بركـان الغلـى لوخـمـد = .لاذكرتك هجوسـي ثـار بركانهـا

البعوضـة تسيـل دم راس الاســد = والمحبـه تنـزل روس شيخانـهـا

والمحب الحقيقـي لاعشـق مازهـد = لو عليه الارض ضاقـت وريعانهـا

من زرع خير بين الناس خير حصـد = ومن زرع شر تاترضيـه قشرانهـا