الموضوع: مــرحـوم ياشيخ وزعيـم ٍ فقـدناه ...مــرحـوم يانســل الرجــال المنـاعير

حل القضا والموت ماهو مناجاه
..................حل القضا ومقدر الامر تقديـر
امر الولي محد ٍ يرده وينحـاه
...................والموت حق ٍ مالنا فيه تغييـر
ولو البكا ايثيـب حنـا بكينـاه
..................والعين تدمع دمعها كنها البيـر
لاشك ماينفع ولابـه مـراواه
..................يالله تصبرنا على خير تصبير
مرحوم ياحر ٍ زعيـم ٍ فقدنـاه
...................مرحوم يانسل الرجال المناعير
مرحوم ياللي تبذل الطيب يمناه
....................مرحوم يامذري الحفاه المفاقير
ننعاه حنا اليوم والكـل ينعـاه
....................يالله عساه بجنتك فيه ويصيـر
ابوفيصل اللي بحكمه عرفنـاه
....................بعيد شوح ٍ حاسب ٍ للمواخيـر
لو قلت قولي مانعـدد مزايـاه
......................يعجز عنه بالقاف كل الشواعير
يدلي ودلوه والهدف وين مرماه
......................سديد راي وعارف كل تدبيـر
يالله عساه برحمتك واتغشّـاه
.....................وتجعل طريقه ياالهي بتيسيـر
وتوفق ابومتعب حنا رضينـاه
......................وحنا معه لاشك بالشر والخير
أسألك انا يالله اتسـدد خطـاه
....................وتبعد عنه اهل الوجيه المغابير
وسلطان عضده بالمهمات يتلاه
.....................سلطان هو سلطان مابه تحازير
وتبقى السعودية عزيزة الجـاه
.......................في ظل حكام ٍ بدوهـا بتعميـر
دستورها القرآن والدين مبـداه
.....................عز ٍ وخير ٍ مع تقدّم وتطوير