وأرجوك من صدك تراني تشبعت ..!!
السلام عليكم
صباح / مساء : الخير
شلووونكم
اخليكم مع القصيده
___ ___
آسف أنا في حبي لك تسرعت
... ظنيت ألاقي فيك شيٍ فقدته
كنت أحسبك مجروح مثلي تولعت
... جربت فرقى شخص قلبك وهبته
كنت أحسبك من مر جرحك تجرعت
... حبيت فيك أحساس طفلٍ لمحته
لو قلت آآآه بوسط روحي توجعت
... ولو شفت دمعاتك شعوري سكبته
ولو تطلب عيوني ابد ما تمنعت
... وأعطيك قلبي لو بعد ما طلبته
وصلت بك أعلى مكان وتربعت
... وفي قلب غيري ياالغضي ما وصلته
واصبر على صدك وأشوفك تدلعت
... واعطيك ود ما أظنك حسبته
أذهلتني بطباعك اللي تطبعت
... حتى قصيدي فيك ابد ما فهمته
لو كان غايتك حروفي فانا بعت
... وافرح بجرح الشاعر اللي جرحته
وأرجوك من صدك تراني تشبعت
... خلك مع اللي عاجبك أو عجبته
يكفي قهر في جيتي لك تواضعت
... تركت غيرك لأجل عينك وبعته
ياليتني عن حب مثلك ترفعت
... ياليت قلبي قبل أعرفك دفنته
لكن أببعد دامني بك توهقت
... الله يرحم حبنا اللي ذبحته
أنا شريت الود والحين أنا بعت
... وأنا عطيتك قلبي اللي قهرته
في يوم جيتك أطلبك ود وأقنعت
... نفسي بأنك شخص عادي عرفته
كمل حياتك مثل ما أنا توقعت
... تبقى أسير الماضي اللي فرضته
ولا يحزنك إني غلطان وتراجعت
... حولك بدالي ألف شخصٍ عجبته
أما أنا لا يمكن اخضع ولا طعت
... يحرم علي أعطيك قلبٍ خذلته
بريّحك من شوفتي يومك قطعت
... أسلوبك اللي به تجامل كرهته
غلطان يا المقفى أنا ما تتبعت
... غيري يتابع خطوتي ما تبعته
ما ينحني راسي لو إني تقطعت
... وما هو أنا لا من رميته لقطته
وان كان غرك كلام عذالي وطعت
... الله يعلم كيف قلبي سكنته
اللي ملا قلبك علي وتسمعت
... خله يعوض شخص مثلي خسرته
أنا بما فيه الكفاية تولعت
... واللي بقى من قلب فيني حرقته
بأول لقاء سلمتك إحساسي وضعت
... غلطت حياتي يوم قلبي سلبته
واستسمحك بالبعد كأني تراجعت
... ما عاد ابلقى فيك شي فقدته
طبعك مثل غيرك وطبعي كما كنت
... أحب شخص ولا تركته¡¡ تركته
وان شفتني صدفة بعينك تطلعت
... ذكرتني بإنسان غالي فقدته
___ ___
اتمنى تنال اعجابكم
