خذ بقايا ذكرياتك اليوم حبنا خسران...
جيتك بقايا روح في هيكل انسان
جفت على درب الأماني دموعه
جيتك جروحٍ تنزف آلام واحزان
وقلبٍ من الفرقا همومه تلوعه
جيتك وفي يديني غصن ورد ذبلان
يبكي على حبٍ تهاوت شموعه
جيتك من الغربه مسافر من أوطان
ونفسي من الترحال صارت جزوعه
جيتك غريبٍ شتته لوعة ازمان
جار الزمن ضده وهشم ضلوعه
جيتك ورغم اللي حصل جيتك حصان
عزيز نفسٍ مارضى في خضوعه
خذ ذكرياتك حبنا اليوم خسران
حنا ظلمنا الحب بأول طلوعه
هاذي نهايتها جروحٍ وحرمان
ضاقت على قلبٍ ضنونه تروعه
يكفي ترى ماعاد انا اتحمل اشجان
يكفي من اللي صار نفسي قنوعه
بودعك قانـع ولانيب ندمـان
مافات مات . صعب والله رجوعه
