حزاية العجيز والشيطان

[ALIGN=CENTER]بسم الله الرحمن الرحيم
بلخير اخواني واخواتي اهل قطرات
والله اني مبطيتن منكم بس مشاغل الدنيا
<<<<<<< تكفين من نشد عنتس
اعاكس الناس 00هم بالصيف يغيبون وانا بالصيف احضر
المهم انا سمعت حزاية او سبحونية اعجبتني مررة
وهي بين عجوز وشيطان
كل العجايز خير وبركة محدن ينكر
بس هن مشهورات بكيدهن وحيلهن وعلشانة الفو هالقصص
تقول السبحونة ان فيذيك القرية الصغيرة عجوزن داااهية
حتى انها والشيطان استوو كل ماكاد بشي كادت العن منة
المهم قال لها الشيطان مالتس فذيا المكان قعاد
مايجوز انا وانتي بمكان
(ادري ان الشيطان يحاكيها قوية بس هي كذا)
عاد المهم قالت او كي <<<< متمدنة
قالت انا بسوي لي مشكلة ان احتلت تفكهن انا بطلع
وان مافكيتهن تقلع انت قال مهيب مشكلة
المهم عجوز قريح فكرت وفكرت
وذي فرصة للمتميلحين اللي يحطون نفسهم اذكيا يبي يبين يدربون مخهم
ثاني يوم راحت لتاجر راعي خلاقين(اقمشة)
جتة وقالت ياوليدي انا ولدي يحب لة وحدة
وهي تحبة ابيك تنقى لي ازين ماعندك بوديها لها اليوم كسوة(هدية)
قام وتنقى لها قطعتن زينة وعطاها العجوز
يومنها رجعت مرت على بيت التاجر وطقت الباب
طلعت لها حرمتة قالت يابنتي ابي طاسة ما تكفين <<<ماعرفوا للكاسات
راحت الضعيفة تجيب حاجتها قامت عجوز قريح ووزت القطعة تحت المتكاة
وجابت لها الما وشربت جعل مافية عافية وطلعت
المرة عودت تشتغل في بيتها <<<< خدامتها مسافرة
المهم يوم عود الرجال لبيتة قعد بالصالة وشاف طرف القطعة
استشك بحرمتة وقام يستدرج في بيتة ويستدرج ويفكر
قال العجوز ودت القطعة لعميلة ولدها ماعاد منهاااااااش
قام على الضعيفة وطردها لبيت اهلها
رجعت للشيطان قالت هاة شرايك¿
قال هاتي الثانية وبفكر بالاولى
راحت تفكرالعجوز في مشكلة ثانية
الين ذاك اليوم بيمر امير قدام بيت العجوز
قامت خذت سطل (طشت) وملتة ماي وسدر ودهن عود
يومن الموكب مرطشت العجوز الما عليهم من فوق الجدار
عقبه طلعت قالت يويلي السموحة تكفى السموحة
ومسكوها حرس الامير
قالت الله يقطعها هالبنت الف مرة اقولها لا تطشين غسولتس بالشارع بس ماتفهم
المهم قال الامير ياويحااااااتة اللي ذا غسولها كيف اجل هي¿
قال ابي افكتس مير بشرررررط
قالت وهي تعرف شرطة00امر ياوليدي
قال ابي افكتس بس زوجينيها
قالت غالي والطلب رخيص وحددو العرس
بعد اسبوع<< الضعيفة مايمدي لها تحجز عند الكوفيرة
المهم رجعت العجيز للشيطان قالت يالله اتحداك تفكهن
قام الضعيف يحك راسة يحك راسة قال ابدن منيب اعرف
قالت هنا ولا هنا ماتعرف¿
قال ابدن كللللللللش
قااااااااااااااااااالت ان حليتهن انا تراك بتذلف براااااااا
قال انجزي بس
قالت نحلها يللة بينا
المشكلة الاولى:
راحت العجوز للتاجر الضعيف طقت الباب
وجتة قالت يويحي ياوليدي سامحني
انا قبل مدة جيت ابي اشرب ما ونسيت لي قماش عندكم
ان تسان عادة محفوضه عطنية لاهنت
قام الرجال بين مصدق ومكذب وعطاها القطعة
وقام يستدرج نوبة ثانية00مايعرف يفكر الين يمشي شكلة
عرف ان مرتة مظلومة ورجعها لبيتها وشكلة لو يعرف ان العجوز هي السبة
كان طلعها على المقبرة طوالي
رجعت للشيطان قالت الاولى حليتها كان ودك تحل الثانية وتخاشرني بالمكان¿
قال منيب حليها انتي
يوم جا اليوم السابع الين الناس منشغلين بالعرس كلن ملتهي من جهة
قامت العجوز وحذفت لها لوح بالبير
وقعدت تصيح وتولول الين اجتمعوا الخلق عليها
قالت بنتي بنتي تكفووووووووون
جوها المناعير يتطامرون من كل جهة من يجيبها00
قامت ذلت يقطون نفسهم ويطلعون بلوح اقل شي بيكسرونة على راسها
قالت بنتي تستحي ولاابي احد يشوفها وانا اللي اجيبهااا
وقامت العجوز ونزلت بالبير وهي تنزل تفكر وش تبي تسوي وش تبي تطلع¿
يوم نزلت لقت سكني ( جني )
لقتة لحيلة قالت وراك قاعدن لحالك
وعلمها بقصتة انة نشب بحلقة عظم وعجزو اهلة في تطبيبة وذبوة
الين يموت00 قال وانتي¿
وعلمتة بسالفتها وضحك السكني ضحك الييييييين نفص العظم من حلقة
وفرح بعمرة وراح لاهلة وعلمهم جو السكون للعجوز
وقالوا عشانتس انجيتي بزرنا حنا نبي نكافئتس اطلبي بس
قالت منيب مكثرة ابي لي بنتن مزيوووووووونة وبس
قالوا ابشري بس تراها تبي تختفي عقب اسبوع
قالت عاااااادي هاتوها الحين دخيل الله
جابوها الينها اجمل ماتكون
وطلعت العجوز ومعها بنتها00واعرسوا العرب وخذت العجوز جهاز البنت
بعد ماحلت العجوز هالمشكلتين رجعت للشيطان الينهو مهب فية
احتمال يكون متفشل منها
وقعدت هي بهالقرية الين ماتت
وتمت وكملت وصلوا على النبي
اسمحوا لي للاطالة
بسم الله علي اما حبا ولابرك
مع حزايتن اوخرى اشوفكم على خير
:cool: [/ALIGN]